He inremna ziah thar lehah hian School Education Department aiawhin Director Lalsangliana’n a ziak a, Doordarshan Kendra Aizawl aiawhin Head of Programme C. Vanlalsiama’n a ziak bawk.

School Education Director Lalsangliana chuan kum 2015-a bul ṭan Educational TV Programme chhunzawm zel a ni chu lawmawm a tih thu a sawi a. DD Mizoram chu thlirtu an tam a, khawpui chhung mai bakah thingtlang leh ram thenawm atangin an thlir thei a, a hlawkna teltu an tam thei hi a hlu hle a ni a ti. 

Edication Director chuan, Educational TV Programme neih hi a tangkai a, Ministry of Education pawhin 'best practices' zingah a pawmsak a ni tih a sawi a. Zirna lam thil pawimawh chi hrang hrang puan chhuahna programme a awm thei hi a lawmawm hle a ni a ti bawk.

DDK Head of Programme C.Vanlalsiama chuan School Education Department nen thawhdunna an ziak leh thei ta chu lawmawm a tih thu a sawi bawk a. School Education Directorate te, SCERT, MBSE leh Samagra Shiksha te ṭha taka thawhhona programme a ni chu a lawmawm hle a ni a ti. Education Department te nena thawkhova programme an siam chu DD Mizoram tan pawh programme ṭangkai tak a nih thu leh thawhhona chu chhunzawm zel theih ni se a duh thu a sawi bawk.

C. Chawngthantluanga, Secretary & Convener, Programme Advisory Committee chuan kum 2015 aṭanga thawhdunna neih tawh dan report pein Educational TV Programme chu School Education, SCERT, MBSE leh Samagra Shiksha te ṭanghova programme siam ṭhin a nih thu a sawi a, kumina thawhhona ziah chu a vawi 8-na a nih thu a tarlang.

Kum khat chhungin episode 52 tihchhuah tur a nih thu te, kum 2015 atanga August 2024 inkarah episode 363 tih chhuah tawh a nih thu te Secretary hian a sawi a. September 2024 aṭangin kum khat chhungin chawlhkar tin Ningani apiangin tlai dar 5:55-6:25pm inkarah programme tihchhuah chhunzawm a ni dawn a, TV Programme hi Media Cell, School Education Department leh SCERT ten an siam leh dawn tih a report bawk.